विवेचन सारांश

ముక్తి సాధనకై కర్మయోగ మార్గము.

పరంపరానుసారంగా దీప ప్రజ్వలనతో ఈరోజు మూడవ అధ్యాయం మూడవ భాగం వివేచన ప్రారంభమైనది. సుందరము, సరళముగా వివేచనను చెప్పడానికి గీతా పరివార్ లోని పేరు మోసిన ప్రశిక్షకులు శ్రీ శ్రీనివాస్ జీ వార్నేకర్ గారిని సాదరంగా ఆహ్వానించారు. అందరికీ సాదర నమస్కారము, గురు ప్రార్ధన, శ్రీకృష్ణ ప్రార్ధన, భారతమాతకు నమస్కరించి, గీతా మహాత్యము చెప్పి ఆపై శ్రీ గోవింద్ దేవ్ గిరిజీ మహారాజ్ చరణములకు నమస్కరించి, గీతా సాధకులు మరియు ప్రేమికులకు సాధరంగా నమస్కరించి శ్రీ వార్నేకర్ గారు ఈరోజు వివేచన కార్యక్రమాన్ని ప్రారంభించారు. భగవద్గీతలో అత్యంత మహాత్వపూర్వమైన కర్మయోగ మనబడే మూడో అధ్యాయం గురించి చర్చించుకుంటున్నాము. "జ్యాయసీ చేత్కర్మణస్తే మతా బుద్ధిర్జనార్దన ..." అంటూ అర్జునుడు అడిగిన ప్రశ్నను చూసాము. రెండవ అధ్యాయంలో భగవంతుడు అర్జునునికి జ్ఞానం యొక్క మహత్యం మరియు కర్మ యొక్క మహత్యము రెండూ చెప్పాడు. ఇది విన్న అర్జునుని మనసు గందరగోళమునకు గురియై, కర్మ కన్నా జ్ఞానము శ్రేష్ఠమైనప్పుడు యుద్ధము లాంటి ఘోర కర్మను చేయడానికి భగవంతుడు నన్ను ఎందుకు ప్రేరేపిస్తున్నాడు అని తలచి ఈ ప్రశ్నను అడుగుతాడు. నీవు రెండు వైపులా మాట్లాడటం వల్ల ముందు నుంచే ఆందోళన పడుతున్న నన్ను మరింత ఆందోళనకు గురిచేస్తోంది, “తదేకం వద నిశ్చిత్య ...” నీవు ఏదో ఒక ఖచ్చితమైన మాట చెప్పమని కోరగా భగవంతుడు ఈ రెండు మార్గాలు కూడా ఒకే గమ్యం వైపు తీసుకుని వెళతాయి, కాని ఎవరి యోగ్యత ప్రకారం వారు తమ మార్గాన్ని ఎంచుకోవలసి ఉంటుంది అని చెబుతాడు. ఇది చెబుతూ భగవంతుడు కర్మయోగం యొక్క మహత్యం, కర్మలు ఏ విధంగా చేయాలి, మన దైనిక కర్మలను నిర్వహిస్తూ వాటిని కర్మయోగముగా ఎలా పరివర్తన చేయాలి మొదలైనవి అర్జునునికి చెప్పాడు. ఇంకా, ఏ పని చేయకుండా ఎవరూ ఒక్క క్షణం కూడా ఉండలేరు, మరి అలాంటప్పుడు మన విహిత మరియు విధిత కర్మలనే ఎందుకు చేయకూడదు, ఈ సృష్టి చక్రానికి ఉపయుక్తకరమైన కర్మలనే ఎందుకు చేయకూడదు, సృష్టి చక్రానికి ఉపయుక్తకరమైన కర్మలు చేయనివారు పాపిష్టివారు మరియు వారి జీవితం వ్యర్థం అని భగవంతుడు చెప్పాడు. ఈ చిన్న చిన్న పనులన్నీ మన కర్తవ్య కర్మలుగా చేయడం వల్ల పరమసిద్ధిని కూడా సాధించవచ్చునని, ఈ విధంగా చాలామంది పరమసిద్ధిని సాధించారని, “కర్మణైవ హి సంసిద్ధిమ్, ఆస్థితా జనకాదయః ...” అంటూ ఒక రాజుని ఉదాహరిస్తూ భగవంతుడు చెప్పాడు. ఒక సన్యాసి, యోగి సాధించగలిగిన పరమసిద్ధిని తన కర్తవ్య కర్మల ద్యారా ఒక రాజు కూడా సాధించగలడు. ఈ విషయాలన్నీ తెలుసుకున్న తరువాత అర్జునునికి శ్రేష్టులు చేయవలసిన కర్మల గురించి భగవంతుడు చెప్పాడు. జీవితంలో అన్నీ సాధించిన తర్వాత కూడా శ్రేష్ఠులు తమ కర్తవ్య కర్మలను చేస్తూనే ఉండాలి, ఎందుకంటే వారిని అనుసరించి కర్మలను చేసేవారు చాలామంది ఉంటారు, “యద్యదాచరతి శ్రేష్ఠః(స్), తత్తదేవేతరో జనః ...”, ఇంట్లో పెద్దవారు తమ కర్మలను చేసినట్లే పిల్లలు అనుసరిస్తూ ఉంటారు. పెద్దవారు అబద్ధాలు చెబితే పిల్లలు కూడా అలాగే చేస్తారు, పెద్దలు మంచి పనులు చేస్తే వాటిని చూసి పిల్లలు కూడా అలాగే చేస్తారు. అందుకే మిగతా వారి ముందు మంచి ఉదాహరణగా శ్రేష్ఠులు, జేస్టులు వారికి ఆవశ్యకత లేనప్పటికీ మంచి పనులు చేస్తూనే ఉండాలి. “న మే పార్థాస్తి కర్తవ్యం(న్), త్రిషు లోకేషు కిఞ్చన ...” ఈ ముల్లోకములలో నేను చేయవలసిన పనులేమియు లేనప్పటికీ, ప్రాప్తించవలసినవి ఏమీ లేనప్పటికీ అన్ని కర్మలు చేస్తూనే ఉంటాను. యజ్ఞం దగ్గర ఎంగిలాకులు తీయడం దగ్గర నుంచి, గోవులను కాయడం దగ్గరనుంచి, యుద్ధ భూమిలో అర్జునునికి కళ్ళాలను చేతబట్టి రథసారథ్యం చేయడం దగ్గర నుంచి, సాయంత్రం యుద్ధ విరామం తర్వాత ఆ రథాశ్వాలకు స్నానం చేయించడం, వాటి గాయాలకు చికిత్స చేయడం లాంటి పనులన్నీ భగవంతుడు స్వయంగా చేసేవాడు. ఎందుకు చేసేవాడు? చేయవలసిన ఆవశ్యకత ఏమి ఉన్నది? “నానవాప్తమవాప్తవ్యం(వ్ఁ) , వర్త ఏవ చ కర్మణి ...” నాకు ప్రాప్తించనిది అంటూ ఏమీ లేనప్పటికీ కర్తవ్య రూపంలో నా ముందుకు వచ్చిన ప్రతి కర్మను నేను ఆచరిస్తాను అని భగవంతుడు చెబుతున్నాడు. ఎందుకంటే “యది హ్యహం(న్) న వర్తేయం(ఞ్), జాతు కర్మణ్యతన్ద్రితః మమ వర్త్మానువర్తన్తే, మనుష్యాః(ఫ్) పార్థ సర్వశః”, ఈ విశ్వం యొక్క సృష్టికర్త, సంరక్షకుడు, భరించేవాడు, పోషించేవాడు, చివరికి తనలోనే ఈ సంసారం మొత్తాన్ని విలీనం చేసుకునేవాడు అయిన పరమాత్మ అలా చేయనట్లయితే ఏమి జరుగుతుంది? బ్రహ్మ విష్ణు మహేశ్వరుల గురించి మనకు తెలుసు. మనల్ని ఈ భూమి ధారణ చేసినది, ఈ భూమి సూర్యుని గురుత్వాకర్షణ శక్తిలో ఉన్నది, ఇలాంటి అనంతమైన సూర్యులు, చంద్రులు, పాలపుంతలను ధారణ చేసిన వాడు భగవంతుడు. భగవంతుడు ఒక్క క్షణమైన తన కర్తవ్యాన్ని నిర్వహించకపోతే ఏమవుతుందో ఊహించుకోండి. ఈ విశ్వ నిర్మాణం మొత్తం నాశనం అయిపోతుంది. అందుకే భగవంతుడు శ్రద్ధతో తన పనులను నిర్వహిస్తూ ఉంటాడు. ఈ విశ్వమంతా నియమానుసారంగానే నడుస్తోంది. నేను నా కర్తవ్య కర్మలను నిర్వహించనట్లయితే మిగతా వారు కూడా అలాగే చేస్తారు. నాకు ఆవశ్యకత లేనప్పటికీ మిగతా వారి ముందు ఉదాహరణగా ఉండటానికి నేను అన్ని పనులను చేస్తున్నాను అని భగవంతుడు చెబుతున్నాడు. “ఉత్సీదేయురిమే లోకా, న కుర్యాం(ఙ్) కర్మ చేదహమ్ సఙ్కరస్య చ కర్తా స్యామ్, ఉపహన్యామిమాః(ఫ్) ప్రజాః” నేను నా పనులను చేయనట్లయితే ఈ లోకాలు నాశనం అయిపోతాయి, బ్రష్టు పట్టి పోతాయి, సాఫీగా జరుగదు. వీరిని సంకరం చేసి నాశనం చేసిన వానిగా నేను చెప్పబడుతాను. ఈ సంసారాన్నంతటిని సృష్టించినవాడే దానిపై శ్రద్ధ తీసుకోకపోవడం వల్ల అంతా నాశనం అయిపోయిందని అందరూ అంటారు. అందుకే నా పనిని నేను శ్రద్ధతో చేస్తుంటాను అని భగవంతుడు చెబుతున్నాడు.4వ అధ్యాయంలో చెప్పుకున్నట్లుగా “ధర్మసంస్థాపనార్థాయ సంభవామి యుగే యుగే” ధర్మాన్ని రక్షించడానికి భగవంతుడు స్వయంగా శ్రీకృష్ణుని రూపంలో అవతరించాడు. ధర్మం అంటే భగవద్గీతలో ముఖ్య రూపంలో కర్తవ్యం అని వస్తుంది. స్వధర్మం అని చెప్పినప్పుడు అది మన కర్తవ్యం. ప్రతి జీవి జన్మించినప్పుడే తన కర్తవ్యం నిర్దేశింపబడుతుంది, దానిని నిర్వహించమని గుర్తు చేయడానికి, ఈ విధంగా చేయమని చెప్పటానికి భగవంతుడు అవతరించి తన కర్తవ్యాన్ని తాను నిర్వహిస్తుంటాడు. ఐదువేల సంవత్సరాల క్రితం చెప్పబడిన ఈ భగవద్గీత ఈరోజు కూడా అంతే ఉపయుక్తమైనది, అంతే శ్రద్ధతో చదువబడుతోంది, ఆచరించడానికి ప్రయత్నం జరుగుతోంది. ఎందుకంటే భగవంతుడే స్వయంగా చేసి చూపించి తరువాత దానిని చెప్పాడు. జీవితాన్ని ఎలా సాగించాలి, కర్మలను ఏ విధంగా చేయాలన్నది భగవంతుడు స్వయంగా ఆచరించి దానిని మిగతా వారికి చెప్పాడు. స్వయంగా చేసిన వారు చెప్పినప్పుడు మిగతా వారికి అది ప్రమాణంగా అనిపించి, వారికి కూడా అదే విధంగా చేయాలని అనిపిస్తుంది. వారి మాటలకు విలువ ఉంటుంది. అందుకే భగవద్గీత ఈరోజు కూడా ఎంతో ఉపయుక్తమైనది. ఈశ్లోకం గురించి జ్ఞానేశ్వర్ మహారాజ్ రాస్తూ నేను నా ఆత్మానందంలో నిమగ్నమై సంతోషంగా ఉంటానని భగవంతుడు చెప్పి ఉంటే మిగతా సంసారం అంతా బ్రష్టు పట్టి నశించిపోతుంది అంటారు.